أشرف طه يكتب: عاصمتك بتعوم يا والي الخرطوم !!

من مطرة وااااحدة بس اكتشفنا انو الخرطوم دي قاعدة في السهلة ساااي !! كلوا كان بونس بعض ..
للاسف ارقي احياء الخرطوم مستحيل تدخلها من يوم المطرة لي اسي !! طبعا قاصد بالاحياء الراقيه (الرياض و المنشية و قاردن ستي) اما الطرفية الا تدخلها طائر !!.
والغريبه للان ماشفنا لينا صورة للوالي وهو واقف في خور او متابع تصريف موية المطرة، زي ما كنا بنشوفوا واقف زمان في ايقاف المناسبات وحفلات الافراح في الصالات والمزارع !!
ياااخ المطرة الواحدة دي عطلت كل العاصمة و مفترض الحكومة تعوض اي مواطن أضرر في اليوم دا حتي الزول الطلع و انزلق وقع وسخ هدوموا وقطع (شبشبو) تعوضوا شان هي السبب !!
غايتو الدخلتها المطرة في حكومة الخرطوم الايام دي ما بتطلع تاني !!
للاسف حتي المجاري ما كانت جاهزة وشوف عيني اغلبها مقفل (تقريبا ناس الارصاد ديل دسو الكورة ما كلموا الحكومة بالمطرة دي )!!
المضحك ضرب لي زول اعلامي ماشي احصل برنامج تلفزيوني قال لي انضف شارع لي الرياض المشتل شنو؟!! قلت لي لو ربنا سهل ليك وصلت عبيد ختم عايز ليك معجزة تاني تدخلك المشتل؟! وتقريبا بكون للان ما وصل !! وطبعا شارع المشتل معروف للجميع.. دا من شدة ما غالي مفترض ازرعوا ورود ..
غايتو المطرة بتبالغ كشفت المستور وعرت الحكومة ..
وعلي قول الفنان .. غرقاااااان وقالوا البتبلبل بعوم !!

أضغط هنا للإنضمام إلى قروبات الوطنtv على الواتساب